Ágúst samdi við Stjörnuna á dögunum og gerði hann tveggja ára samning.

Hann var í viðræðum við félagið í átta eða níu daga eins og hann greindi frá í viðtalinu en hann er þegar farinn að skoða markaðinn og gæti bætt við sig nokkrum öflugum leikmönnum fyrir næsta tímabil.

Það verður þó byrjað á því að semja við þá leikmenn sem eru að renna út á samningi.

„Nei, við erum að reyna að halda okkar mönnum sem eru ekki á samning og verðum með okkar menn. Góð blanda af leikmönnum, bæði reyndum og menn sem hafa orðið Íslandsmeistarar og ungir strákar gerðu vel og eru Íslandsmeistarar í 2. flokki, þannig ég tek við góðu búi," sagði Ágúst við Fótbolta.net.

„Þetta verður spennandi og gaman að púsla þessu saman. Eins og ég sagði í einhverju viðtali þá mun ég reyna að styrkja um fjóra eða fimm leikmenn. Sú vinna er hafin og við erum þegar farnir að tékka á leikmönnum og hafa sambönd við félög og annað."

Ekkert ákveðið með aðstoðarþjálfarastöðuna

Ágúst á enn eftir að ákveða hver tekur við sem aðstoðarþjálfari en hann segist hafa rætt við nokkra góða menn. Þá er einnig góður möguleiki á því að styrktarþjálfari komi inn í teymið.

„Við erum með gott teymi í kringum liðið. Við erum Rajko í markmannsþjálfarastöðunni, góða sjúkraþjálfara, ég er kominn og erum með rekstrarstjóra í Þorvaldi Örlygssyni og við erum með frábæra yngri flokka þjálfara í Ejub, Veigari og fleiri góðum mönnum þannig það vantar í rauninni aðstoðarþjálfara og erum að skoða með styrktarþjálfara."

„Það kemur allt til greina og erum að skoða markaðinn. Eins og ég fékk á fyrsta fundi með Stjörnunni er að þeir ætla að gera þetta vel og vera þolinmóðir í ráðningum. Þeir létu mig bíða í átta eða níu daga og það eru nokkrir þjálfarar sem ég er búinn að hitta sem eru líka að bíða. Við ætlum að vera þolinmóðir og velja réttu mennina í starfið," sagði hann ennfremur.