Freyr Alexandersson, annar þjálfara Leiknis.
Freyr Alexandersson, annar þjálfara Leiknis, var nokkuð brattur eftir 1-1 jafntefli Leiknis við Fylki í Breiðholti í kvöld. Leiknir jafnaði leikinn mínútu fyrir leikslok með marki eftir hornspyrnu. Aðspurður um spilamennsku liðsins hafði Freyr þetta að segja:
Lestu um leikinn: Leiknir R. 1 - 1 Fylkir
„Hún var bara ágæt, ekkert frábær en hún var ekkert slök heldur. Við höfum spilað betur og fengið engin stig. Við náum ekki rytma oft á tíðum og fannst það aðallega vera varnarlega sem við náum ekki takti. Þá er ég aðallega að tala um í fyrri hálfleik þar sem mér fannst við of langt frá þeim."
Þá var Freyr spurður út í markið sem Leiknir fékk á sig en það var heldur neyðarlegt eftir langt innkast Fylkismanna.
„Ég sá það reyndar ekki, ég var að tala við Stjána(innsk. Kristján Pál Jónsson, leikmann Leiknis), en bara langt innkast og mark, ég er ósáttur við það. Fyrir utan það fær Albert eitt færi en við sköpuðum ekki mörg færi heldur. Þetta var bara stöðubarátta og tvö lið sem langaði í þrjú stig og þurftu á þremur stigum að halda en endar með einu stigi á lið og það er bara niðurstaðan í kvöld." sagði Freyr.
Einnig talaði hann um mikilvægi þess að enda taphrinu Leiknis og fleira. Viðtalið má sjá í heild að ofan.
