Haraldur Haraldsson, stuðningsmaður Víkings R. og áhugamaður um íslenskan fótbolta, bendir mönnum á Twitter á að efsta deild á Íslandi mun eiga fjögur lið í Evrópukeppnum í stað þriggja eftir aðeins tvö ár.
Það eru bara þrjú lið frá Íslandi sem fá að taka þátt í forkeppnum Evrópukeppna og hefur flottur árangur að undanförnu skilað mikið af stigum til íslensku deildarinnar sem er í samkeppni við smæstu deildir Evrópu.
Nú er íslenska deildin komin upp fyrir þá albönsku og þá velsku, upp í 47. sæti af 55 þjóðum.
Við getum þakkað Breiðabliki og Víkingi R. sérstaklega fyrir þennan árangur en KR sótti einnig dýrmæt stig á dögunum með sigri á heimavelli gegn Pogon Szczecin eftir stórt tap ytra.
Haraldur bendir á að árangurinn í Evrópu í ár er svipaður og íslensk félagslið náðu árin 2004, 2013 og 2014. Mönnum er sérstaklega minnisstætt þegar Stjarnan sló Lech Poznan óvænt úr leik 2014. Stjarnan tapaði svo úrslitaleiknum um sæti í riðlakeppni Evrópudeildarinnar gegn ítalska stórveldinu Inter sem hafði unnið Meistaradeildina aðeins nokkrum árum fyrr.
Ísland hefur tryggt sér fjögur Evrópusæti! Það verða fjögur lið sem vinna sér Evrópusæti í deild og bikar á næsta ári og keppa 2024 á Evrópumótunum. Fimm neðstu þjóðirnar utan Liechtenstein fá bara þrjú lið. Nú eru sex þjóðir fyrir neðan okkur úr leik. #fotboltinet #staðfest pic.twitter.com/Eo6vqoHt4D
— Haraldur Haraldsson (@HarHaralds) July 28, 2022
