Arnar var rekinn í dag.
Þau stóru tíðindi voru að berast úr Laugardalnum að búið sé að reka Arnar Þór Viðarsson úr starfi landsliðsþjálfara Íslands.
„Stjórn KSÍ hefur tekið ákvörðun um að leysa Arnar Þór Viðarsson frá störfum sem þjálfara A landsliðs karla og mun nú hefja leit að eftirmanni hans. Stjórnin metur þetta nauðsynlegt skref með hagsmuni liðsins í huga og möguleikann á að ná þeim árangri sem þarf til að koma liðinu aftur í fremstu röð," segir í tilkynningu KSÍ.
Arnar tók við þjálfun liðsins í desember 2020. Hann hefur verið harðlega gagnrýndur fyrir störf sín og í könnun á Fótbolta.net í síðustu sögðust 89 prósent lesenda vilja losna við hann strax.
En hver tekur við liðinu af Arnari? Hérna fyrir neðan má sjá tíu kosti sem gætu tekið við liðinu.
Ísland hóf nýverið leik í undankeppni EM 2024 og er með þrjú stig eftir leiki; liðið tapaði 3-0 gegn Bosníu en vann svo Liechtenstein í öðrum leik sínum 7-0.
Arnar Gunnlaugsson - Hefur náð mjög eftirtektarverðum árangri með Víkinga og er frábær persónuleiki sem myndi sameina þjóðina.
Óskar Hrafn Þorvaldsson - Hefur unnið frábært starf með Breiðabliki og er mikill fótboltaheili. Spilar skemmtilegan fótbolta og hefur náð góðum árangri hvert sem hann hefur farið.
Rúnar Kristinsson - Lék á sínum tíma 104 A-landsleiki fyrir Ísland. Hefur unnið flott starf á sínum þjálfaraferli og unnið fjölda titla.
Arnar Grétarsson - Hefur sannað sig sem besta varnarþjálfara Bestu deildarinnar. Myndi koma með gömlu góðu gildin aftur.
Lars Lagerback - Þjóðhetja sem bjó til gullaldarliðið. Fáum hann heim!
Freyr Alexandersson - Hefur gert flotta hluti með lítið fjármagn hjá Lyngby. Þekkir vel til í kringum landsliðið.
Erik Hamren - Er á lausu eftir að hafa verið rekinn frá AaB. Var vanmetinn landsliðsþjálfari þegar hann var með íslenska liðið.
Davíð Snorri Jónasson - Einn af okkar efnilegustu þjálfurum. Er núna með U21 landsliðið en hann kom U17 landsliðinu á Evrópumótið fyrir nokkrum árum. Hann og Freyr gætu myndað gott teymi í A-landsliðinu.
Age Hareide - Fyrrum landsliðsþjálfari Danmerkur. Á blaði er hann fullkominn kostur í starfið. Hefur stýrt stórliðum á Norðurlöndum og unnið marga titla.
Sam Allardyce - Hann kann að drilla sterkan varnarleik og búa til sterka liðsheild. Hann er atvinnulaus og sakar ekki að kanna stöðuna á honum. Var með 100 prósent sigurhlutfall sem landsliðsþjálfari Englands en stýrði að vísu bara einum leik.
Athugasemdir
