Arnar Viðarsson segir að öll þrjú lið riðilsins; Ísland, Ísrael og Albanía, telji sig geta unnið Þjóðadeildarriðilinn.
Íslenska landsliðið dvelur í Danmörku og æfir á æfingasvæði Bröndby áður en haldið verður til Ísrael þar sem leikið verður gegn heimamönnum í Þjóðadeildinni á fimmtudag.
Eftir æfingu í dag ræddi Arnar Þór Viðarsson landsliðsþjálfari við Fótbolta.net. Rætt var um stöðuna á hópnum, ástæðuna fyrir því að æft er í Kaupmannahöfn og komandi verkefni.
Eftir æfingu í dag ræddi Arnar Þór Viðarsson landsliðsþjálfari við Fótbolta.net. Rætt var um stöðuna á hópnum, ástæðuna fyrir því að æft er í Kaupmannahöfn og komandi verkefni.
„Núna erum við bara að einbeita okkur að Ísrael, flestir af þeirra leikmönnum spila í Ísrael. Þeir spiluðu 5-3-2 í síðustu undankeppni en nú er kominn nýr þjálfari. Hann var með U21-landsliðið þar sem hann spilaði mikið 4-4-2 svo við erum að búa okkur undir mismunandi mögulegar uppstillingar hjá andstæðingnum," segir Arnar.
„Ísrael er léttleikandi og vilja sækja, spila mikið á stuttum sendingum í gegnum miðjuna. Við erum búnir að vera að leikgreina þá og komum þeim upplýsingum til leikmanna okkar í dag og á morgun. Albanía er svo að spila allt öðruvísi fóbolta."
Ísland, Ísrael og Albanía eru bara þrjú í riðlinum eftir að Rússum var bannað að taka þátt. Hvernig metur Arnar möguleikana á því að lenda í efsta sæti í riðlinum?
„Það breytir riðlinum mikið að Rússland sé sjálfkrafa í fjórða sæti. Það líta öll liðin á þetta þannig að þau geti unnið riðilinn, við gerum það líka. Við erum spenntir að byrja þetta. Við erum ekkert hræddir við að segja það að við viljum ná fyrsta sætinu. Öll liðin eiga möguleika á því að vinna þetta og öll geta þau endað í þriðja sæti."
Fim 2. júní: 18:45 Ísrael - Ísland (Þjóðadeildin, Sammy Ofer Stadium)
Mán 6. júní: 18:45 Ísland - Albanía (Þjóðadeildin, Laugardalsvöllur)
Fim 9. júní: 18:45 San Marínó - Ísland (Vináttuleikur, San Marino Stadium)
Mán 13. júní: 18:45 Ísland - Ísrael (Þjóðadeildin, Laugardalsvöllur)
