Idrissa Gana Gueye gerði fyrra mark leiksins í 2-0 sigri PSG gegn Manchester City í riðlakeppni Meistaradeildarinnar á þriðjudagskvöldið.
Man City kom sér nokkrum sinnum í hættulegar stöður og brenndi Bernardo Silva dauðafæri en inn vildi boltinn ekki. Gueye segir að það hafi verið einfalt að verjast gegn City því það hafi vantað allan hraða í sóknarleikinn.
„Þetta var erfiður leikur en okkur tókst að verjast vel og beita skyndisóknum. Það var mikilvægt að verjast vel og það var einfalt því það vantaði hraða í sóknarleikinn þeirra," sagði Gueye en Raheem Sterling, Jack Grealish og Riyad Mahrez mynduðu sóknarlínu City.
„Það sem skiptir máli er að við náðum í stigin, þau eru afar mikilvæg eftir jafnteflið í Brugge. Við spiluðum eins og lið og það skiptir ekki máli hverjir skoruðu heldur að liðið gerði vel og vann."
PSG deilir toppsæti riðilsins með Club Brugge, með fjögur stig eftir tvær umferðir. City er með þrjú stig og getur klifrað yfir Belgana frá Brugge með sigri í innbyrðisviðureign.
Athugasemdir