Ítalska félagið Juventus mun á næstu dögum leggja fram 45 milljóna evra tilboð í Karim Adeyemi, leikmann Borussia Dortmund í Þýskalandi, en þetta segir ítalski blaðamðurinn Gianluca Di Marzio.
Þýski landsliðsmaðurinn er eftirsóttur og hefur hann sjálfur gefið í skyn að hann gæti verið á förum frá Dortmund.
Adeyemi er 22 ára gamall öskufljótur sóknarmaður sem byrjaði meðal annars úrslitaleik Meistaradeildar Evrópu á síðustu leiktíð.
Juventus ætlar að reyna sannfæra Dortmund um að selja hann, en félagið mun á næstu dögum leggja fram 45 milljóna evra tilboð, en tíu milljónir af kaupverðinu eru árangurstengdar.
Samkvæmt Di Marzio hefur Juventus boðið leikmanninum fjögurra ára samning með möguleika á að framlengja um annað ár.
Það hefur verið nóg að gera hjá stjórn Juventus í sumarglugganum, en félagið hefur þegar fengið þá Douglas Luiz, Khephren Thuram, Juan Cabal og Michele Di Gregorio.
Jean-Clair Todibo og Teun Koopmeiners eru einnig nálægt því að ganga í raðir 'gömlu konunnar'.
Athugasemdir
