Fjölnir féll úr leik í 32-liða úrslitum Mjólkurbikarsins í dag eftir tap í ótrúlegum leik gegn HK. Fótbolti.net ræddi við Gunnar Má Guðmundsson, þjálfara liðsins, eftir leikinn.
Lestu um leikinn: Fjölnir 3 - 4 HK
„Fúll að missa niður tveggja marka forystu. Okkur leið illa að vera með forystu, bregðumst vel við í bæði skiptin sem þeir jafna, förum að sækja og spila aftur fótbolta en hundfúlt að fá á okkur tvö mörk eftir hornspyrnu í lokin," sagði Gunnar Már.
Fjölnir var með 2-0 forystu í hálfleik en missti hana niður í jafntefli eftir tíu mínútur í seinni hálfleik.
„Mér fannst þetta vera ódýrt mark, við fáum á okkur mark eftir að við eigum innkast við hornfána og þeir sleppa í gegn. Fyrsta pressa eftir að boltinn tapast er léleg. Mér fannst við ekki með sjálfstraust eftir að við erum komnir yfir. Það vantaði meiri ró."
Fjölnir spilar í 2. deild í sumar eftir að hafa fallið úr Lengjudeildinni síðasta sumar.
„Hún er ágæt, liðið er að koma saman og við höfum staðið okkur vel í þessum vetrarmótum. Við ætlum okkur stóra hluti í sumar, ætlum okkur upp. Það er erfitt að rýna í þessa deild, það eru nokkur lið sem eru klárlega ekki tilbúin. Við mætum í hvern leik hverju sinni."
