Ítalía: Þægilegt fyrir Fiorentina - Monza vann í Sassuolo

Nicolás González kom Fiorentina yfir snemma leiks og gerði Alberto Dossena svo sjálfsmark eftir fyrirgjöf frá Michael Kayode, bakverði Fiorentina sem var líflegur í sigrinum.

Cagliari komst nálægt því að minnka muninn í fyrri hálfleik en fyrrnefndur Kayode bjargaði á marklínu, og var seinni hálfleikurinn afar bragðdaufur.

Heimamenn í Flórens gerðu vel að róa leikinn niður í síðari hálfleik til að innsigla sigurinn, en Fiorentina er komið með 14 stig eftir sjö umferðir, alveg eins og Juventus og Napoli. Cagliari er á botninum með tvö stig.

Torino og Verona gerðu þá markalaust jafntefli og eru í neðri hluta deildarinnar á meðan Monza vann óvæntan sigur á útivelli gegn Sassuolo. Þar átti Michele Di Gregorio markvörður Monza stórleik og var besti leikmaður vallarins.

Lorenzo Colombo gerði eina mark leiksins í sigri Monza en hann kom boltanum aftur í netið undir lokin en ekki dæmt mark vegna rangstöðu.

Sassuolo og Monza eru jöfn með 9 stig eftir 7 umferðir.

Fiorentina 3 - 0 Cagliari
1-0 Nicolas Gonzalez ('3 )
2-0 Alberto Dossena ('21 , sjálfsmark)
3-0 M'Bala Nzola ('94)

Sassuolo 0 - 1 Monza
0-1 Lorenzo Colombo ('66 )

Torino 0 - 0 Verona