Á þinginu voru samþykktar tímabótabreytingar á efstu deild karla þar sem tekin er upp úrslitakeppni í Bestu deildinni. Þær tillögur, og fleira sem samþykkt var á þinginu, er afrasktur starfshópa og vinnu milli þinga. Stefnumörkun KSÍ er almennt frekar svifasein og þung í vöfum en þarna náðust þó nokkuð stór skref.

Það sem ég saknaði á þinginu er meiri umræða um málefni knattspyrnunnar, þar sem 148 fulltrúum gefst tækifæri til að miðla af reynslu sinni, ræða vandamál og lausnir, skipast á skoðunum og vinna sig saman að niðurstöðu.

Fyrirkomulag þingsins í dag minnir á afar gamaldags samkomur – þar sem sú litla umræða sem fer fram af hálfu almennra þingfulltrúa er um einstakar tillögur, og þá venjulega í því formi að fólk kemur upp og lýsir sig fylgjandi eða andsnúið einstökum tillögum, um þær eru stundum greidd atkvæði – en venjulega eru slíkum málum vísað til stjórnar. Litlir möguleikar eru til að ræða saman í smærri hópum og finna sameiginlegan flöt eða niðurstöðu. Það er lýsandi dæmi að á þinginu held ég að það hafi talað sjö almennir þingfulltrúar í umræðum af 148 sem voru mættir.

Við nýtum afar illa alla þá þekkingu og reynslu sem samankomin er á þingi KSÍ með því að vinna ekki meira í hópum, þar sem hægt væri að ræða einstök verkefni og málefni. Fyrirkomulagið ætti að vera þannig að fleiri fái færi á að taka þátt í umræðum í stað þess að þingið sé hálfgerð klappsamkoma. Málþingið sem haldið er kvöldið fyrir þing, er skref í rétta átt, en við getum gert miklu, miklu betur.

Mig langar að skora á nýkjörna stjórn KSÍ að endurskoða þinghaldið allt frá grunni, það verður að koma vinnubrögðum á þingi KSÍ í áttina að nútímanum. Með því fáum við miklu betri umræður og úrlausnir í einstökum málum, fótboltanum til framdráttar.

Flosi Eiríksson, formaður Knattspyrnudeildar Breiðabliks