Ítalía: Gonzalez og Jovic afgreiddu Milan

Nico Gonzalez gerði fyrsta mark leiksins af vítapunktinum er Fiorentina tók á móti Ítalíumeisturum AC Milan í síðasta leik kvöldsins í ítalska boltanum.

Staðan var markalaus í leikhlé eftir að heimamenn höfðu verið sterkari aðilinn og verðskulduðu þeir að taka forystuna í upphafi síðari hálfleiks. Gonzalez steig á vítapunktinn eftir klaufalegt brot Fikayo Tomori innan vítateigs. Enski miðvörðurinn missti Jonathan Ikoné framhjá sér og braut á honum. 

Gonzalez skoraði örugglega af vítapunktinum og opnaðist leikurinn mikið við þetta mark. Bæði lið komust nálægt því að skora áður en Luka Jovic kom inn af bekknum og tvöfaldaði forystu heimamanna með flottum skalla eftir fyrirgjöf frá Ikone.

Markið skoraði Jovic á 87. mínútu og innsiglaði þar með sigur Fiorentina. Gestirnir frá Mílanó náðu að minnka muninn seint í uppbótartíma þegar bakvörðurinn öflugi Theo Hernandez skoraði með bylmingsskoti en það dugði ekki til.

Lokatölur urðu 2-1 og er Milan búið að missa annað sæti deildarinnar. Liðið situr í fjórða sæti og er í harðri baráttu um Meistaradeildarsæti.

Þetta var annar sigurinn í röð hjá Fiorentina, sem siglir lygnan sjó um miðja deild.