Þór/KA vann 1-2 endurkomusigur á ÍBV í opnunarleik Pepsi Max-deildar kvenna, leikið var á Hásteinsvelli í Vestmannaeyjum.

Það var Delaney Baie Pridham sem kom heimakonum yfir með fyrsta marki Íslandsmótsins á 11. mínútu leiksins. DBP skoraði eftir undirbúning frá Kristjönu Sigurz.

ÍBV leiddi í hálfleik en um miðbik seinni hálfleiks jafnaði Hulda Ósk metin fyrir Akureyringa. Sandra Nabweteme átti sendingu á Huldu sem „labbar í gegnum vörn ÍBV og klárar mjög vel úr þröngu færi," eins og Eyþór Daði Kjartansson orðaði það í textalýsingu frá leiknum.

Sandra hafði komið inn á sem varamaður þegar Colleen Kennedy þurfti að yfirgefa völlinn eftir hálftíma leik vegna meiðsla.

Á 81. mínútu skoraði svo Karen María sigurmark Þór/KA eftir að Helena Jónsdóttir skaut boltanum í hana. Karen slapp ein í gegn og skoraði framhjá Auði Sveinbjörnsdóttur í marki ÍBV.

Fleiri urðu mörkin ekki og Þór/KA byrjar mótið á sigri í Vestmannaeyjum.

Nú er í gangi leikur Breiðabliks og Fylkis. Smelltu hér til að fara í beina textalýsingu frá Kópavogsvelli.