Meiðslalisti Crystal Palace lengist - „Mér að kenna"
Mynd: EPA
Mynd: EPA
Oliver Glasner er í miklum vandræðum hjá Crystal Palace en meiðslalistinn er orðinn ansi langur.
Eberechi Eze var ekki með í síðustu umferð gegn Wolves og verður lengur frá. Þá eru menn á borð við Adam Wharton, Matheus Franca og Jefferson Lerma fjarverandi.
Þá er Eddie Nketiah kominn á listann en hann er meiddur aftan í læri.
„Hann hljóp mest gegn Villa í 83 mínútur. Þetta eru mín mistök, það er mér að kenna að ég tók hann ekki fyrr út af gegn Wolves því hann var á fullu þar líka," sagði Glasner en Crystal Palace nældi í sinn fyrsta sigur í deildinni gegn Aston Villa fyrir tveimur vikum og gerði jafntefli gegn Wolves í síðustu umferð.
Liðið fær Fulham í heimsókn um helgina en Will Hughes verður einnig fjarverandi þar sem hann tekur út leikbann.
