Júlíus Magnússon
„Þetta var mjög fagmannleg frammistaða hjá okkur. Fyrri hálfleikur var með okkar betri frammistöðum á útivelli miðað við allar aðstæður allavega, ekki kannski fótboltalega séð en við lásum leikinn vel og gerðum það sem við þurftum að gera.“ Sagði fyrirliði Víkinga Júlíus Magnússon um leik sinna manna eftir 3-0 sigur Víkinga á Keflavík suður með sjó fyrr í dag.
Lestu um leikinn: Keflavík 0 - 3 Víkingur R.
Víkingar hafa verið duglegir að nýta þau færi sem liðið hefur fengið í undanförnum leikjum en liðið hefur skorað 12 mörk í síðustu tveimur leikjum og nýtt sín færi gríðarlega vel.
„Við erum með svakaleg gæði í þessum ungu strákum sem eru að spila framávið, léttleikandi og með hraða líka þetta er blanda sem þú vilt hafa i öllum liðum. Svo þetta eru bara gæðin í liðinu og þegar við vinnum boltann hátt á vellinum þá erum við banvænir. Það er ástæða þess að lið hápressa til að ná þessum stöðum.“
Sigurinn í dag auk þess að Breiðablik þurfti að gera sér að góðu tap á Akureyri verður til þess að forskot Blika á Víkinga minnkar niður í sex stig og staða Víkinga lítur ögn betur út í dag en hún hefur gert að undanförnu.
„Þegar úrslitin eru svona þá lítur þetta betur út en við verðum bara að hugsa um næsta leik. Það er ennþá langt upp á við en nóg af leikjum eftir þannig að við verðum bara að hugsa um okkur og halda áfram og taka bara einn leik í einu.“
Sagði Júlíus en allt viðtalið má sjá hér að ofan.
