Casemiro: Amorim fær góðan og metnaðarfullan hóp í hendurnar

Casemiro er 32 ára gamall með eitt og hálft ár eftir af samningi sínum við Man Utd en hann hefur fengið sinn skerf af gagnrýni eftir slaka frammistöðu Rauðu djöflanna á upphafi tímabils.

„Mér líður eins og þetta hafi bara verið einn slæmur leikur hjá mér, gegn Liverpool, ekki satt? Allt liðið átti slakan leik gegn Liverpool, ekki bara ég," sagði Casemiro um gagnrýnina.

„Mér finnst þetta hafa verið góð byrjun á tímabilinu fyrir mig en auðvitað vil ég halda áfram að bæta mig. Ég vil halda áfram að hjálpa liðsfélögunum, þjálfaranum og Manchester United.

„Rúben Amorim er sigurvegari og við erum mjög spenntir fyrir því að hjálpa honum í nýju starfi. Hann fær góðan og metnaðarfullan leikmannahóp í hendurnar, þar sem við viljum allir læra nýja hluti og ná toppsæti deildarinnar."