Ísland lagði Úkraínu 1-0, á Laugardalsvelli í kvöld, í mikilvægum sigri þar sem liðið tryggði sér sín fyrstu þrjú stig. Sandra María Jessen var ánægð með niðurstöðuna og innkomu Thelmu Karenar Pálmadóttur í byrjunarliðið.
„Við erum ótrúlega glaðar að hafa náð í okkar fyrstu stig og þau þrjú. Fyrst og fremst sáttar með það,“ sagði Sandra María eftir leik.
Lestu um leikinn: Ísland 1 - 0 Úkraína
„Heilt yfir vorum við að gera góða hluti og þetta er eitthvað sem við getum byggt ofan á.“
Aðstæður höfðu talsverð áhrif á leikinn að hennar mati, en völlurinn var mjög blautur sem gerði spilamennsku erfiðari.
„Boltinn skaust rosalega mikið á grasinu. Við vorum að ná helling af fyrirgjöfum og koma okkur í góðar stöður, en þegar sendingin inn í teig var ekki fullkomin var rosalega erfitt að ná góðum tökum á boltanum. Auðvitað eigum við að gera betur.“
Þrátt fyrir að aðeins eitt mark hafi litið dagsins ljós var það nóg til sigurs.
„Við náðum að skora eitt mark og það er auðvitað það sem skiptir máli. Það hefði verið fallegt að ná inn fleiri, en sigur er sigur og við erum sáttar með það.“
Hún telur að lykillinn fram undan sé þolinmæði í sóknarleiknum.
„Við þurfum að vera þolinmóðar með boltann. Halda í hann, færa hann frá hægri til vinstri og velja réttu augnablikin til að sækja. Þá getum við skapað okkur góð færi.“
Næsti leikur er gegn Englandi, en Sandra María er bjartsýn.
„Það er allt hægt, líka á móti Englandi.“
Thelma Karen Pálmadóttir var í fyrsta skiptið í byrjunarliðinu í kvöld og hrósaði Sandra María henni í hástert.
„Hún er bara frábær leikmaður. Rosalega, rosalega efnilegur leikmaður. Með mikinn sprengikraft, getur skotist upp völlinn og kemur leikmönnum sífellt á óvart. Rosalega góð einn og einn og er að skapa sér góðar stöður. Rosalega spennandi leikmaður sem er með mörg góð spil á hendinni. Nú er bara að halda áfram að rækta hana og hafa trú á henni, því hún getur allt sem hún vill.
Sjáðu viðtalið í heild í spilaranum hér að ofan
