ÍA hefur lagt fram tilboð í Tryggva Hrafn Haraldsson, leikmann Vals, en þetta segir Kristján Óli Sigurðsson, sparkspekingur Þungavigtarinnar, á X í dag.
Tryggvi er 28 ára gamall framherji og uppalinn Skagamaður, en ÍA hefur lengi haft áhuga á því að fá hann aftur heim.
Hann fór tvisvar út í atvinnumennsku. Fyrra skiptið var árið 2017 en þá hélt hann til Halmstad í Svíþjóð og sneri síðan aftur í ÍA tveimur árum síðar. Í október árið 2020 samdi hann þá við Lilleström í Noregi en kom aftur heim um áramótin og gekk þá í raðir Vals.
Á þessum fjórum tímabilum hefur hann gert 35 mörk í deild- og bikar með Val.
Samkvæmt heimildum Kristjáns Óla hefur ÍA lagt fram tilboð í Tryggva og eru því líkur á því að Tryggvi sé að snúa aftur í heimahaga.
ÍA er að missa Hinrik Harðarson til Odd í Noregi en hann verður væntanlega staðfestur hjá norska félaginu síðar í dag. Skagamenn hafa því brugðist við með því að reyna við Tryggva Hrafn.
Liðið hafnaði í 5. sæti Bestu deildarinnar á síðustu leiktíð.
Heimavinnan sefur aldrei.
— Kristján Óli Sigurðsson (@kristjanoli) March 16, 2025
ÍA hefur boðið metfé í Tryggva Hrafn Haraldsson hjá Val.#HeimavinnaHöfðingjans pic.twitter.com/M5VRz87c1p
Athugasemdir
