Elísabet og stöllur hennar í Kristianstad eru úr leik
Elísabet Gunnarsdóttir og stöllur hennar í Kristianstad eru úr leik í sænska bikarnum eftir að liðið tapaði fyrir Häcken, 2-1, í undanúrslitum í dag.
Emelía Óskarsdóttir var í banni í dag eftir að hafa fengið rauða spjaldið í síðasta leik og því ekki í hóp.
Hlín Eiríksdóttir var hins vegar í byrjunarliðinu á meðan Amanda Andradóttir byrjaði á bekknum.
Kristianstad komst yfir á 26. mínútu og fékk tækifærið til að koma sér í þægilega stöðu inn í hálfleikinn er liðið fékk víti en Jordan Brewster brenndi af.
Häcken kom til baka í þeim síðari og skoraði tvö mörk. Amanda kom inná undir lok leiks hjá Kristianstad sem er úr leik í sænska bikarnum þetta árið.
Sara Björk hafði betur gegn Guðnýju
Sara Björk Gunnarsdóttir sat allan tímann á varamannabekk Juventus sem vann AC Milan, 2-0, í meistarariðli ítölsku deildarinnar.
Guðný Árnadóttir spilaði allan leikinn í vörn Milan. Juventus er í öðru sæti meistarariðilsins með 43 stig en Milan í 4. sæti með 34 stig.
Glódís Perla Viggósdóttir var í vörn Bayern München sem vann Köln, 5-0, í þýsku úrvalsdeildinni. Karólína Lea Vilhjálmsdóttir kom inná á 54. mínútu. Bayern er með 40 stig í öðru sæti deildarinnar.
Athugasemdir
