Leikur Aftureldingar og Gróttu byrjaði vel. Saga Líf Sigurðardóttir átti sláarskot á 5. mínútu leiksins, en eftir það róaðist leikurinn töluvert.

Afturelding var með yfirhöndina næstu tuttugu mínúturnar en Grótta tók síðan við sér. Elaina Carmen La Macchia, markvörður Aftureldingar, varði frábært langskot og virtist örugg í öllum sínum aðgerðum.

Staðan markalaus í hálfleik en snemma í þeim síðari skoraði Ariela Lewis fyrir Mosfellinga og það gegn sínu gamla félagi. Hildur Karítas Gunnarsdóttir átti þessa laglegu sendingu inn fyrir á Arielu sem potaði boltanum framhjá markverði Gróttu.

Aðeins sex mínútum síðar svöruðu gestirnir. Rebekka Sif Brynjarsdóttir með fallegt skot fyrir utan teig og í netið. Elaina illa staðsett í skotinu.

Áhugaverð staða kom upp á 61. mínútu. Elaina meiddist og þurfti að fara af velli, en Afturelding var ekki með varamarkvörð og fór því Andrea Katrín Ólafsdóttir í markið. Andrea er systir Ólafs Íshólm Ólafssonar markvarðar Fram í Bestu deild karla.

Tíu mínútum fyrir leikslok fékk Hildur Björk Búadóttir, leikmaður Gróttu að líta sitt annað gula spjald í leiknum og þar með vísað af velli.

Undir lok leiks fengu bæði lið dauðafæri til að skora. Hildur Karítas átti hörkuskot sem Margrét Rún Stefánsdóttir varði og hinum megin á vellinum varði Andrea frábærlega og bjargaði stiginu fyrir heimakonur.

Afturelding heldur öðru sætinu með 20 stig en nú er HK komið fyrir Gróttu og 3. sætið eftir 1-0 sigurinn á Grindavík í Kórnum.

Hin 16 ára gamla Ísabel Rós Ragnarsdóttir kom inn af bekknum hjá HK og skoraði sigurmarkið í síðari hálfleiknum.

HK er núna með 20 stig eins og Afturelding, en með slakari markatölu. Grótta er í 4. sæti með 18 stig og Grindavík í 8. sæti með 13 stig.

Framarar komu sér upp í 6. sæti með 2-0 sigri sínum á Selfossi á JÁVERK-vellinum.

Markamaskínurnar Murielle Tiernan og Alda Ólafsdóttir skoruðu mörk Fram á síðasta hálftímanum. Murielle kom Fram á bragðið á 67. mínútu og tryggði Alda sigurinn þrettán mínútum síðar.

Fram er núna með 15 stig en Selfoss er í 9. sæti deildarinnar með aðeins 9 stig.

Úrslit og markaskorarar:

Afturelding 1 - 1 Grótta
1-0 Ariela Lewis ('52 )
1-1 Rebekka Sif Brynjarsdóttir ('58 )
Rautt spjald: Hildur Björk Búadóttir, Grótta ('80) Lestu um leikinn

Selfoss 0 - 2 Fram
0-1 Murielle Tiernan ('67 )
0-2 Alda Ólafsdóttir ('80 )

HK 1 - 0 Grindavík
1-0 Ísabel Rós Ragnarsdóttir ('80 )