Championship: Burnley og Leeds í úrvalsdeildina (Staðfest)

Burnley tók á móti Sheffield United í lokaleik 44. umferðar tímabilsins í ensku Championship deildinni og úr varð hörkuslagur í toppbaráttunni.

Burnley gat tryggt sér sæti í ensku úrvalsdeildinni með sigri í dag og var það fyrirliðinn sjálfur Josh Brownhill sem sá um það verkefni.

Brownhill skoraði fyrsta mark leiksins á 28. mínútu áður en Tom Cannon jafnaði, en Brownhill skoraði aftur skömmu fyrir leikhlé með marki af vítapunktinum.

Síðari hálfleikurinn var steindauður þar sem Burnley gerði mjög vel að drepa leikinn niður svo lokatölur urðu 2-1.

Burnley og Leeds United eru því bæði örugg með sæti í ensku úrvalsdeildinni þar sem þau eru komin með 94 stig, átta stigum meira heldur en Sheffield þegar tvær umferðir eru eftir. Sheffield fer í umspilið ásamt Sunderland.

Bristol City og Coventry eru líklegust til að komast með í umspilið en Middlesbrough, Millwall og Blackburn Rovers eru einnig í harðri baráttu um síðustu lausu sætin.

Burnley fer því beint aftur upp í efstu deild eftir fall í fyrra á meðan Leeds er að snúa aftur í úrvalsdeildina eftir tveggja ára fjarveru.