Bandaríska félagið D.C. United mun greiða Schalke 70 milljónir íslenskra króna fyrir Guðlaug Victor Pálsson. Þetta segir Patrick Berger hjá þýska miðlinum Sport1.
Eins og Fótbolti.net greindi frá fyrr í dag þá er Guðlaugur Victor á leið til D.C. United, en hann mun skrifa undir langtímasamning við félagið á næstu dögum.
Sjá einnig:
Rooney að fá Guðlaug Victor frá Schalke
Bandaríska félagið sýndi honum fyrst áhuga fyrir nokkrum vikum og náðist samkomulag um íslenska miðjumanninn á síðasta sólarhringnum.
Sport1 greinir frá því að D.C. United greiðir Schalke 500 þúsund pund eða 70 milljónir íslenskra króna fyrir Guðlaug.
Þessi 31 árs gamli leikmaður á aðeins ár eftir af samningi sínum hjá Schalke en hann kom til félagsins frá Darmstadt á síðasta ári og hjálpaði liðinu að komast aftur upp í efstu deild.
Guðlaugur Victor hefur ekki spilað með landsliðinu síðan í október en hann hefur nýtt þann tíma í að vera nær syni sínum sem býr í Kanada og spilaði það stóra rullu þegar tilboðið frá bandaríska félagiinu kom upp á borð.
Hann mun nú spila undir stjórn Wayne Rooney, markahæsta leikmanns enska landsliðsins frá upphafi, en Rooney tók við keflinu á dögunum eftir að hafa stýrt Derby County í ensku B-deildinni. Guðlaugur verður annar leikmaðurinn sem Rooney fær á eftir Ravel Morrison, sem kom einmitt frá Derby.
Athugasemdir