Glódís átti góðan leik í kvöld.
Glódís Perla Viggósdóttir, miðvörður íslenska landsliðsins, var að vonum ánægð eftir 2-0 sigurinn gegn Hvíta-Rússlandi í fyrsta leik í undankeppni EM 2017 á Laugardalsvelli í kvöld.
Íslenska liðið hafði mikla yfirburði allan leikinn og var sigurinn, sem hefði getað verið stærri, fyllilega verðskuldaður.
Íslenska liðið hafði mikla yfirburði allan leikinn og var sigurinn, sem hefði getað verið stærri, fyllilega verðskuldaður.
Lestu um leikinn: Ísland 2 - 0 Hvíta-Rússland
„Við erum rosalega ánægðar með þennan sigur, það skiptir miklu máli að fara vel af stað, halda hreinu og ná að skora tvö mörk. Þetta er náttúrulega rosalega erfiður leikur þannig lagað, þar sem þær eru bara að pakka og eru með blokkir sem er erfitt að komast í gegnum. En mér fannst við ná að halda þolinmæðinni og við náðum að skora tvö virkilega góð mörk," sagði Glódís eftir leikinn.
Glódís var í raun í meira sóknarhlutverki en varnarhlutverki í þessum leik og átti margar frábærar sendingar á sóknarmenn Íslands.
„Ég lendi nú ekki oft í því en það var bara gaman að vera ofar og fá að vera með í spilinu. Við vorum alveg meðvitaðar að við yrðum að vera tilbúnar, þær geta alveg break-að," sagði Glódís, sem þakkaði kærlega fyrir góðan stuðning, en yfir 3000 manns mættu á völlinn.
„Ég er ótrúlega ánægð og þakklát fyrir stuðninginn, það skiptir ótrúlega miklu máli. Það er ekki oft sem menn heyra ekki í hvor öðrum inni á vellinum út af stuðningi, það er bara frábært," sagði Glódís.
Viðtalið má sjá hér að ofan.
