Amorim hefði valið 63 ára markmannsþjálfara framyfir Rashford

Amorim var spurður út í fjarveru Marcus Rashford og sagðist frekar vilja setja 63 ára gamlan markmannsþjálfara hjá sér á bekkinn heldur en Rashford.

„Þetta er alltaf sama ástæðan, hann er ekki að æfa nógu vel. Þetta er mjög augljóst og ég get séð þetta á hverjum einasta degi á æfingasvæðinu. Ég mun ekki breyta minni skoðun á þessu, ef ákveðin atriði breytast ekki á æfingum þá mun liðsvalið hjá mér ekki breytast," sagði Amorim eftir sigurinn.

„Þetta gildir um alla leikmenn liðsins. Ef þeir gefa ekki 100% í þetta þá fá þeir ekki að spila. Þetta er ekki flókið.

„Okkur sárvantaði hraðann leikmann á varamannabekkinn í dag en ég myndi frekar setja Jorge Vital þangað heldur en leikmann sem leggur sig ekki 100% fram á hverjum degi."

Jorge Vital er fyrrnefndur markmannsþjálfari Rauðu djöflanna en Tyrell Malacia reyndist eini kantmaðurinn á varamannabekk Man Utd í dag þar sem Rashford var skilinn eftir utan hóps.

Amorim var þá spurður út í argentínska kantmanninn Alejandro Garnacho, sem er sterklega orðaður við Napoli og er Chelsea einnig áhugasamt.

„Enginn veit hvað gerist í næstu viku, við verðum að bíða og sjá. Hann (Garnacho) er að taka miklum framförum á þessu tímabili, hann er búinn að bæta leikskilninginn sinn til muna og ég er að reyna að finna bestu stöðuna fyrir hann á vellinum. Við þurfum á svona beinskeyttum leikmönnum eins og honum að halda en ég veit ekki hvað gerist í framtíðinni."