Þorsteinn Halldórsson.
Frá æfingu á dögunum.
„Undirbúningurinn hefur gengið vel, þetta hefur rúllað vel og hlutirnir hafa verið í lagi hjá okkur,” sagði Þorsteinn Halldórsson, landsliðsþjálfari, þegar fréttamaður Fótbolta.net spjallaði við hann á hóteli landsliðsins í Poznan í Póllandi í kvöld.
Á morgun spilar Ísland vináttulandsleik við Pólverja og er það eini og síðasti leikur liðsins fyrir Evrópumótið í Englandi.
Steini segir að allir leikmenn íslenska liðsins séu heilir, þar á meðal Guðný Árnadóttir sem var að glíma við meiðsli í aðdraganda mótsins.
„Það er allt í góðum gír og allt á réttri leið.”
Er eitthvað sem Steini er svekktur með í undirbúningnum? „Nei, í sjálfu sér ekki. Þetta er allt svona samkvæmt plani. Við erum að æfa í Póllandi við fínar aðstæður og spilum hörkuleik á morgun. Svo komum við okkur yfir til Þýskalands og höldum áfram að undirbúa okkur.”
Sumar af þjóðunum sem eru að taka þátt á mótinu hafa verið að spila fleiri en einn leik. Steini var spurður aðeins út í það. „Jú, það var skoðað en við vorum ekkert æst í að spila marga leiki. Þetta snýst um að undirbúa sig vel og nota þann undirbúning sem maður hefur. Einn leikur eða tveir leikir, við hefðum aldrei getað spilað meira en tvo leiki. Fólk verður líka að átta sig á því að þjóðirnar koma saman á mismunandi tímum. Það er öðruvísi undirbúningur fyrir þær þjóðir þar sem deildirnar voru búnar í maí að spila. Þær byrjuðu að æfa fyrr en við.”
Steini fékk ekki allan hóp sinn saman fyrr en fyrir rúmri viku síðan þar sem deildin hér á Íslandi er enn í fullum gangi og erum við með fleiri leikmenn erlendis sem eru í sumardeildum og komu seint til móts við liðið vegna þess.
Ísland reyndi að fá heimaleik á Laugardalsvelli fyrir mót en því miður gekk það ekki eftir í þetta skiptið. Í staðinn var haldin opin æfing þar sem fólk fékk tækifæri til að kveðja liðið áður en það hélt út til Póllands þar sem eini æfingaleikur liðsins fyrir mót verður spilaður. Steini telur að sá leikur - og allar æfingarnar - veiti bestan undirbúning á þessum tímapunkti.
Allt viðtalið við Steina er í spilaranum hér fyrir ofan.
Leikir Íslands á EM:
10. júlí gegn Belgíu (Academy Stadium, Manchester)
14. júlí gegn Ítalíu (Academy Stadium, Manchester)
18. júlí gegn Frakklandi (New York Stadium, Rotherham)
