Ísland mætir Evrópumeisturum Englands á City Ground vellinum í Nottingham, heimavelli Nottingham Forest, klukkan 12:30 á laugardaginn. Að því tilefni fengum við Sædísi Rún Heiðarsdóttur til að ræða um leikinn ásamt því að gera upp 3-0 tapleikinn gegn Heimsmeisturum Spánar.
„Blendnar tilfinningar, auðvitað endum á að tapa 3-0 en mér fannst við verjast vel og það er klárlega eitthvað sem við getum tekið með okkur. Þetta er náttúrlega svakaleg gott fótboltalið og fannst við sýna að þegar við erum þéttar og erum allar á þá er lítið sem kemst í gegnum okkur.“
„Fyrst og fremst kannski varnaleikurinn, mér fannst við verjast virkilega vel og það er klárlega eitthvað sem við getum byggt á og þurfum að byggja á.
Fyrsta mark Spánar var verulega umdeilt en Albanski dómarinn ákvað að stöðva ekki leikinn þegar Sveindís Jane fékk þungt höfuðhögg. Hvernig lítur þetta við leikmönnum í hópnum?
„Við sáum þetta á vídjófundi og okkur finnst auðvitað að hún eigi að stoppa leikinn og ég held samkvæmt reglubókinni þá eigi hún að gera það en við eigum hins vegar að halda áfram þar til hún er búin að flauta.“
Stelpurnar eiga strax annan hörkuleik gegn Evrópumeisturum Englands, hvernig horfir hún á það verkefni?
„Ég er virkilega spennt og virkilega skemmtilegt að fá svona tvo sterka andstæðinga í röð og geta mátað sig við þá. Þetta eru auðvitað leikir sem þú vilt spila og ég held að við séum bara virkilega gíraðar.“
Það er vel valin kona í hverri stöðu hjá Englandi og líklegt að Sædís þurfi að hafa gætur á stórstjörnum úr ensku deildinni, líkt og Lauren James og Beth Mead er hún eitthvað að pæla í því hverjum hún mætir inn á vellinum?
„Nei voða lítið, ég held að það myndi ekki gera neinum gott. Þannig maður reynir bara að spila sinn leik og ekkert pæla neitt í andstæðingunum.
Er hún eitthvað byrjuð að hugsa um næsta skref á sínum ferli?
„Auðvitað langar manni að spila á hærra leveli ég get ekkert logið um það og auðvitað er það stefnan en hvenær það kemur verður bara að koma í ljós og ég geri mitt á meðan ég er í Noregi.“
https://youtu.be/btvQ0P4HPc4
