,,Ég er alls ekki sáttur, en við áttum kannski ekki mikið meira skilið meðað við hvernig við spiluðum," sagði Rúnar Kristinsson, þjálfari KR-inga eftir 1-1 jafntefli gegn Keflvíkingum í kvöld.
,,Við spiluðum ekki góðan leik og Keflvíkingarnir voru meira ógnandi en við. Þó svo við höfum verið meira með boltann, þá voru þeir alltaf ógnandi þegar þeir voru með hann og sköpuðu sér fleiri færi en við alla vega."
,,Þeir komu mér ekki á óvart, þeir eru mjög vel skipulagðir. Þetta eru flinkir ungir strákar margir hverjir í blandi við þessa eldri leikmenn sem fyrir eru. Þeir eru bara með skipulagt lið og leika fína knattspyrnu, sem er bara gaman að sjá."
,,Þeir féllu náttúrulega dálítið aftarlega á völlinn og leyfðu okkur að hafa boltann og beittu síðan skyndisóknum. Við féllum oft fyrir því og létum þá fá boltann og bjóðum upp á þetta, en sem betur fer komumst við inn í hálfleik með markalaust jafntefli."
,,Við gátum lagað aðeins okkar leik sem að skánaði í þeim síðari, en náðum bara ekki að halda út þessu eina marki sem við höfðum."
,,Ég bara veit ekki hvort ÍBV leikurinn sitji í okkur. Menn voru ágætlega ferskir á æfingum í vikunni og menn eru ekkert að kvarta yfir því að spila fótboltaleiki þar sem það er það skemmtilegasta það sem við gerum, það eru þessar æfingar sem eru hundleiðinlegar."
Rúnar gæti skoðað markaðinn, en félagaskiptiglugginn opnar eftir þrjá daga.
,,Maður heldur augunum opnum bara og fylgist með hvað er að gerast í kringum sig, en við höfum ekki tekið neinar ákvarðanir með eitt né neitt ennþá. Þetta kemur bara í ljós á næstu vikum," sagði hann að lokum.
