Landsliðskonan Arna Eiríksdóttir segir stemninguna góða í íslenska landsliðshópnum fyrir komandi heimaleiki gegn Úkraínu og Englandi. Leikurinn gegn Úkraínu fer fram á Laugardalsvelli næsta þriðjudag. Verkefnið leggst vel í Örnu og hún er spennt.
„Bara ótrúlega vel, tveir hörkuleikir, ólíkir andstæðingar en þetta er bara mjög spennandi.“ sagði Arna þegar hún ræddi við Fótbolta.net
Arna var að glíma við meiðsli í síðasta landsliðsverkefni og tók því ekki þátt þá en segir sig nú klára í verkefnið.
„Ég var að díla við eitthvað vesen í sköflungsbeinunum, kannski ekki alveg þessi týpísku meiðsli en ég er búin að ná mér að fullu núna, líður vel og er klár í slaginn.“
Hún segir fókusinn skýran innan hópsins fyrir verkefnið.
„Fyrst og fremst erum við bara að hugsa um að taka einn leik í einu. Bara byrja á fyrri leiknum og einbeita okkur algjörlega að honum, áður en við förum mikið að pæla í seinni andstæðingnum.“
Að hennar sögn bíða tvö ólík verkefni.
„Þetta eru ólíkir andstæðingar og kannski ólíkt verkefni því sem var síðast en þetta leggst vel í okkur og við verðum tilbúnar.“
Arna segir stuðninginn úr stúkunni geta skipt sköpum.
„Ótrúlega mikilvægt, það eiginlega skiptir bara öllu máli. Það getur verið svona þetta extra boost sem fleytir manni áfram, þannig vonandi verður stúkan full.“
Skilaboðin til stuðningsmanna eru einföld:
„Bara mæta á völlinn, það er ekkert mikið flóknara en það.“
Viðtalið í heild má sjá í spilaranum hér að ofan
