Sólveig í leik með FH í sumar.
,,Þetta er einn erfiðasti útivöllur að koma á svo ég held við getum ekki verið annað en gríðarlega sáttar með þessi stig sem við fengum," sagði Sólveig Þórarinsdóttir varnarmaður FH eftir 0 - 3 sigur á ÍBV á Hásteinsvelli í kvöld.
,,Þetta var alls ekki auðvelt. Það er aldrei auðvelt að koma til Vestmannaeyja og sigra. Við bjuggumst ekki við að skora þrjú mörk en við vorum mjög vel undirbúnar og búnar að búa okkur gríðarlega vel undir þetta. Það gekk allt upp."
FH hefur haft tak á ÍBV og vann fyrri leik liðanna 4-1 auk þess sem þær unnu ÍBV í umspili um sæti í efstu deild fyrir þremur árum.
,,Við erum búnar að vera rússíbana lið og virðumst ná okkur algjörlega á strik á móti þeim. Ég veit ekki hvort það eru eyjastelpurnar eða við að eiga góðan dag en eitthvað er það."
