Gary Martin náði að opna markareikning sinn í Pepsi-deildinni fyrir Víkinga og þá átti Arnþór Ingi Kristinsson þrusuflottan leik og komst einnig á blað.

Gunnar Nielsen átti eina bestu vörslu tímabilsins til þessa á hans gamla heimavelli. Þórarinn Ingi Valdimarsson var virkilega sprækur á kantinum hjá Íslandsmeisturunum. Besti maður Stjörnunnar var Baldur Sigurðsson sem lagði upp jöfnunarmarkið í leiknum á snilldarlegan hátt.

Í vörninni teflum við fram þremur bakvörðum sem allir voru frábærir: Davíð Kristján Ólafsson var flottur í vörn og sókn fyrir Breiðablik gegn KR og lagði upp eina mark leiksins, Andrés Már Jóhannesson lék í bakverði og var valinn maður leiksins þegar Fylkir sótti sitt fyrsta stig upp á Skaga og Viðar Ari Jónsson lék á als oddi og skoraði gull af marki þegar Fjölnir rúllaði yfir Víking Ólafsvík. Enginn af þeim átti skilið að vera skilinn eftir utan úrvalsliðsins!

Með þeim í vörninni er svo Damir Muminovic hjá Breiðabliki sem sýndi enn og aftur að hann er einn allra besti miðvörður deildarinnar.

Valur átti ekki í vandræðum með nýliða Þróttar. Danski sóknarmaðurinn Nikolaj Hansen er kominn úr meiðslum og hélt upp á það með því að skora og vera valinn maður leiksins. Þá er Herra Fjölnir, Gunnar Már Guðmundsson, í liðinu eftir flottan sigur gegn Ólsurum.

Sjá einnig:
Úrvalslið 4. umferðar
Úrvalslið 3. umferðar
Úrvalslið 2. umferðar
Úrvalslið 1. umferðar