,,Þetta var flottur leikur, liðið lagði sig fram eins og þarf að gera á móti Fylkismönnum. Það þarf að gera það til að vinna Fylkismenn, þeir berjast allan tímann og það þarf að leggja sig meira fram en þeir," sagði Haukur Páll við Fótbolta.net.

,,Fyrir leikinn bjóst maður ekki við að við myndum skora fimm mörk á Fylkismennina. Við spiluðum hörkuvel, það var leiðinlegt að fá þetta mark á sig í restina en við tökum þennan sigur glaðir með fimm mörkum."

Haukur fór meiddur af velli gegn Breiðablik í þriðju umferð og missti af leiknum gegn Grindavík í fjórðu umferð áður hann snéri aftur gegn Fylki þar sem hann opnaði markareikning sinn í sumar.

,,Ég kom sterkari til baka og ákvað að setja hann þarna eftir að hafa fengið nokkur færi í sumar."

,,Við erum búnir að fá heilan helling af föstum leikatriðum í upphafi móts, ég veit ekki hversu margar hornspyrnur við erum búnir að fá. Maður hefði kannski viljað nýta það betur með því að setja hann eitthvað þar," sagði Haukur sem er gríðarlega sterkur skallamaður.

,,Ég skoraði fimm með skalla í fyrra og auðvitað vill maður skora mörk með skalla fyrst maður er sterkur þar. Ég á eftir að setja fleiri í sumar með hausnum," bætti Haukur við en hann ætlar að skora mun fleiri mörk í sumar.

,,Ég setti sex í fyrra í fimmtán leikjum og maður setur stefnuna hærra en það í sumar, maður ætlar að setja allavega sjö."

Valsmenn hafa unnið þrjá síðustu leiki í deildinni eftir að hafa verið án sigurs í fyrstu þremur umferðunum.

,,Það er góður stígandi í liðinu og flottur andi í hópnum. Við eigum leik á móti Selfossi á mánudag og það verður hörkuleikur. Við þurfum að leggja okkur fram í öllum leikjum ef við ætlum að ná einhverju úr þeim."

,,Ef við leggjum okkur ekki fram gegn Selfyssingum þá töpum við þeim leik. Menn vera að leggja sig fram fyrir hvern annan eins og í síðustu þremur deildarleikjum," sagði Haukur sem vill lítið tala um toppbaráttu.

,,Við tökum einn leik fyrir í einu. Það er búið að sýna sig í þessari deild að það geta allir unnið alla og ef við komum ekki klárir í hvern einasta leik getum við tapað á móti hvaða liði sem er."

Sjá einnig:
Leikmaður 6.umferðar - Sigurbjörn Hreiðarsson (Valur)
Leikmaður 5.umferðar - Haukur Páll Sigurðsson (Valur)
Leikmaður 4.umferðar - Haukur Baldvinsson (Breiðablik)
Leikmaður 3.umferðar - Eyþór Helgi Birgisson (ÍBV)
Leikmaður 2.umferðar - Sævar Þór Gíslason (Selfoss)
Leikmaður 1.umferðar - Steinþór Freyr Þorsteinsson (Stjarnan)