Það var boðið upp á mikla skemmtun í Árbænum í kvöld þegar Fylkir og KR gerðu 3-3 jafntefli. Rúnar Páll Sigmundsson, þjálfari Fylkis, hafði þetta að segja eftir leik:
Lestu um leikinn: Fylkir 3 - 3 KR
„Þetta var bráðskemmtilegur fótboltaleikur, kannski sanngjarnt jafntefli ég veit það ekki. Við byrjuðum leikinn ekki nægilega vel og enduðum hann ekki heldur nægilega vel," sagði Rúnar.
Fylkismenn vildu fá hendi á Theodór Elmar í jöfnunarmarkinu en hann sagði í viðtali eftir leik að boltinn hefði bara farið í andlitið á sér.
„Ég hef ekki séð þetta en talaði við fólk, Gummi Ben segir að þetta sé 95 eða 98% hendi. Ég veit ekki hvort Emmi sé að ljúga að okkur eða segja satt."
Fylkir er án ósigurs í fjórum síðustu leikjum en Rúnar er ósáttur við mörkin sem liðið er að fá á sig.
„Við erum að fá á okkur full klaufaleg mörk, ég er ekki alveg sáttur við það. Við erum að fá á okkur of mörg klaufaleg mörk miðað við hvað við reynum að spila góða vörn. Við þurfum að fækka mistökum."
Emil Ásmundsson fór af velli eftir höfuðhögg og Orri Sveinn Stefánsson fór meiddur útaf í seinni háfleik. Meiðslalisti Fylkis er orðinn ansi langur.
„Það er alltof mikið af skakkaföllum. Þeir verða líklega hvorugir með í næsta leik en vonandi fáum við Elís og Óla Kalla inn, það ræðst á næstu dögum," segir Rúnar Páll.
Viðtalið má sjá í heild í sjónvarpinu hér að ofan.
