ÍA vann annan leik sinn í A-deild Lengjubikarsins í dag er liðið lagði Grindavík að velli, 2-0, í Akraneshöllinni.

Það tók dágóðan tíma fyrir heimamenn að skora fyrsta markið en Ármann Ingi Finnbogason gerði það á 79. mínútu leiksins.

Daníel Ingi Jóhannesson náði að auka forystuna aðeins þremur mínútum síðar og þannig tryggja Skagamönnum sigurinn. Daníel er sonur Jóhannesar Karls Guðjónssonar og því yngri bróðir Ísaks Bergmanns, sem spilar fyrir FCK og íslenska landsliðið.

Þetta var fyrsta mark Daníels fyrir meistaraflokk ÍA.

Annar sigur ÍA í Lengjubikarnum staðreynd en liðið er með 6 stig í 3. sæti riðils 1. Grindavík er án stiga í næsta neðsta sætinu.