Bellingham verður langheitasti bitinn á markaðnum á næsta ári, en síðustu þrjú tímabil hefur hann verið með bestu mönnum Borussia Dortmund.

Dortmund keypti hann frá Birmingham árið 2020 og er hann fastamaður á miðjunni. Félagið vill fá í kringum 130 milljónir evra fyrir hann á næsta ári en Liverpool, Manchester City og Manchester United eru meðal þeirra sem eltast við hann og þá eru spænsku félögin Barcelona og Real Madrid einnig í baráttunni.

Bayern, sem hefur það að sið að sækja leikmenn frá Dortmund, ætlar líklega ekki að vera með í baráttunni um Englendinginn.

„Við erum ekkert að hugsa um það. Bellingham er auðvitað stórkostlegur leikmaður, en við erum með Kimmich, Goretzka, Gravenberch og Sabitzer. Ég get sagt að við séum í geggjuðum málum fyrir þessa stöðu," sagði Kahn við Bild.