Það komu nokkur Íslendingalið við sögu í leikjum dagsins á erlendri grundu þar sem Logi Tómasson var í byrjunarliði Samsunspor gegn stórveldi Fenerbahce er liðin mættust í Adana.
Liðin mættust í undanúrslitum tyrkneska ofurbikarsins og lék Logi fyrri hálfleikinn. Kerem Aktürkoglu skoraði snemma leiks og var Fenerbahce sterkari aðilinn.
Þjálfari Samsunspor gerði þrefalda skiptingu í leikhlé en ekki bættust málin. Fenerbahce var áfram betra liðið og innsiglaði Jhon Durán, fyrrum framherji Aston Villa, sigurinn í síðari hálfleik. Lokatölur 2-0. Fenerbahce mætir Galatasaray í úrslitaleiknum.
Brynjólfur Andersen Willumsson var þá í byrjunarliði Groningen sem steinlá í æfingaleik gegn norska félaginu Bodö/Glimt. Norðmennirnir gerðu sér lítið fyrir og unnu með fjögurra marka mun.
Í Grikklandi var Hjörtur Hermannsson ónotaður varamaður í tapi Volos í 16-liða úrslitum bikarsins og að lokum var Aron Einar Gunnarsson ekki í hóp í sigri Al-Gharafa í Katar.
Fenerbahce 2 - 0 Samsunspor
1-0 Kerem Akturkoglu ('4)
2-0 Jhon Duran ('67)
Groningen 0 - 4 Bodö/Glimt
Volos 0 - 1 Kifisia
Umm-Salal 2 - 3 Al-Gharafa
Athugasemdir
