Sex leikir hófust klukkan 20:00 í Meistaradeildinni. Tveir leikir kláruðust rétt fyrir 20:00 þegar Bayern og Juventus tryggðu sig áfram í 16-liða úrslit.

PSG þraukaði gegn Brugge á meðan Real valtaði yfir Gala
Mauro Icardi skoraði eina mark PSG þegar liðið lagði Club Brugge á heimavelli í kvöld. Markið kom á 22. mínútu. Mauro Icardi, Angel Di Maria og Kylian Mbappe eru funheitir þessa stundina svo alls ekki óvænt að einn af þeim hafi skorað.

Á Bernabeau fékk Real fljúgandi byrjun þegar Galatasaray kom í heimsókn. Brasíliska ungstirnið Rodrygo skoraði tvö mörk á fyrstu sjö mínútunum en Rodrygo verður ekki nítján ára fyrr en í janúar.

Sergio Ramos ákvað að taka sjálfur vítaspyrnu þegar Real fékk eina slíka á 14. mínútu. Ef Rodrygo hefði fengið að taka vítaspyrnuna hefði hann bætt met yfir sneggstu þrennu í sögunni. Ramos skoraði úr spyrnunni með laglegu Panenka víti. Karim Benzema skoraði svo 4. og 5. markið. Rodrygo náði að klára þrennuna á lokamínútu uppbótartíma. Fræbærlega gert hjá Brassanum sem er yngsti Brasilíumaðurinn til að skora í Meistaradeildinni. Real og PSG í góðri stöðu í þessum riðli.

Tottenham með flottan sigur í Belgrad - Hiti í Zagreb
Ekkert hefur gengið hjá Tottenham undanfarið en liðið heimsótti Rauðu Stjörnuna í Belgrad í kvöld. Giovani Lo Celso kom Spurs yfir í fyrri hálfleik og Heung-min Son skoraði næstu tvö mörk leiksins og Christian Eriksen rak síðasta naglan í kistuna þegar skammt var eftir.

Í Zagreb var mikill hiti þegar Shakhtar kom í heimsókn. Staðan var 1-1 í hálfleik. Á fimm mínútna kafla fengu leikmenn beggja liða rautt spjald. Í kjölfarið komu fjögur mörk. Zagreb komst í 3-1 en í uppbótartíma tókst Shakhtar að komast til baka. Brasilíumaðurinn Tete jafnaði leikinn á áttundu mínútu uppbótartímans með marki úr vítaspyrnu. Shakhtar komið upp í annað sæti riðilsins.

Markmannabras á City og Leverkusen sigraði Atletico
City notaði þrjá markverði í jafntefli gegn Atalanta á útivelli. Ederson byrjaði í markinu en fór af velli fyrir Claudio Bravo í hálfleik. Í seinni hálfleik fékk Bravo að líta rauða spjaldið og þá var hægri bakverðinum Kyle Walker skipt inn á í markið. Raheem Sterling og Mario Pasalic skoruðu mörk leiksins.

Leverkusen vann óvæntan sigur á Atletico á heimavelli í kvöld. Leverkusen var á botni þessa riðils og Atletico með sjö stig eftir þrjár umferðir. Leverkusen var heilt yfir betra í kvöld og komst í 2-0. Fyrra markið var afar skrautlegt sjálfsmark hjá Thomas Partey undir lok fyrri hálfleiks og seinna markið skoraði Kevin Volland.

Staðan í riðlunum
A: PSG hefur 12 stig og er komið áfram í A-riðli. Real Madrid þarf tvö stig í viðbót til að fylgja PSG áfram. B: Bayern er komið áfram og Tottenham vantar einn sigur í viðbót til að elta Bayern upp úr riðlinum. C: City er stigi frá öruggu sæti áfram á meðan Shakhtar og Dinamo berjast hatrammlega um 2. sætið. Bæði lið hafa fimm stig. D: Juventus er komið áfram og Atletico þarf einn sigur í viðbót til að fylgja Juventus áfram.