England: Kane hetjan gegn West Brom

Nýliðar West Bromwich Albion tóku á móti Tottenham í fyrsta leik dagsins í ensku úrvalsdeildinni.

Fyrri hálfleikur var fjörugur og skiptust liðin á að eiga hættulega kafla. Bæði lið fengu fín færi en staðan var markalaus í leikhlé.

Tottenham var með völdin fyrri hluta seinni hálfleiks og átti Sam Johnstone nokkrar góðar vörslur. Heimamenn áttu fínan kafla um miðbik hálfleiksins og þurfti Hugo Lloris að hafa sig allan við til að halda stöðunni jafnri.

Tottenham tók aftur völdin á vellinum undir lok leiksins og náði Harry Kane að koma knettinum í netið á 88. mínútu. Matt Doherty gaf þá fyrirgjöf inn í teiginn og gerði Kane vel að stýra knettinum í netið með góðum skalla. Johnstone virkaði afar óöruggur í úthlaupinu og gerði Kane auðvelt fyrir. Hann átti góðan leik á milli stanganna en átti að gera betur í markinu.

Tottenham er komið á toppinn með sigrinum, lærisveinar Jose Mourinho eru með 17 stig eftir 8 umferðir. West Brom er enn án sigurs og aðeins með 3 stig.