Eiður Smári Guðjohnsen var ráðinn sem aðalþjálfari til næstu tveggja ára. Davíð Þór Viðarsson, fyrrum fyrirliði FH, verður aðstoðarþjálfari Eiðs og Logi Ólafsson mun verða í starfi tæknilegs ráðgjafa.

Logi og Eiður tóku við FH á miðju tímabili og undir þeirra stjórn hefur árangurinn verið góður. Liðið hafnaði í öðru sæti Pepsi Max-deildarinnar.

Davíð Þór þarf ekki að kynna fyrir stuðningsmönnum FH og knattspyrnuáhugafólki almennt; einn besti leikmaður FH frá upphafi sem mun stíga sín fyrstu skref í þjálfun undir stjórn Eiðs.

Davíð, sem var lengi vel fyrirliði FH, vann sjö Íslandsmeistaratitla með FH, fjórum sinnum sem fyrirliði liðsins. Davíð spilaði 319 leiki fyrir FH og skoraði í þeim ellefu mörk.

Tómas Þór Þórðarson líkti Davíð við Heimi Guðjónsson í útvarpsþættinum Fótbolta.net í gær. Heimir steig sín fyrstu skref í þjálfun sem aðstoðarþjálfari FH eftir að hafa verið fyrirliði liðsins þar á undan.

„Eftir að þetta meistaraflokksráð tók við og fór að vinna á bak við tjöldin í Krikanum, þá hefur verið rosalega mikið jákvætt í gangi. Þetta er öflugt ráð," sagði Elvar Geir Magnússon.

Tómas tók í sama streng og sagði: „Þeir taka Eið sem var alveg áhætta. Maðurinn hefur ekki þjálfað sem aðalþjálfari. Hann stýrði öllu og Logi var ritstjórinn. Eiður varð mjög fljótt í að setja upp æfingar og þess háttar."

„Þeir halda Loga í ráðgjafahlutverki. Laugi fer út - þeir eru að reyna að hrista upp í hlutunum - og þeir fá Davíð Þór inn. Maður sér hann (Davíð Þór) eiginlega sem einhvern nýjan Heimi Guðjónsson."

„Maður bíður bara eftir því að Davíð verði mættur á hliðarlínuna sjálfur ef Eiður fer til Club Brugge eða eitthvað að þjálfa. Hann er svipaður þannig séð og Heimir í þessu... þeir eru í flottum málum. Það er ekkert eðlilega stórt fyrir deildina að halda Eiði Smára sem aðalþjálfara í þessari deild," sagði Tómas Þór.

Meira var talað um FH og fleira í útvarpsþættinum sem hlusta má í heild sinni hér að neðan.