Víkingur mætir Breiðabliki í opnunarleik Bestu deildarinnar þann 10. apríl.
Frá fundinum í dag.
Mætast Gylfi og Jói í fyrsta leik?
Ríkjandi Íslandsmeistarar Víkings héldu kynningarfund í Fossvoginum í dag þar sem félagið afhjúpaði nýja treyju, hannaða af Halldóri Smára, og kynnti nýjan samstarfsaðila, en Boozt verður á treyjum liðsins á komandi tímabili.
Sölvi Geir Ottesen, þjálfari Víkings, var á meðal þeirra sem tóku til máls á fundinum og ræddi Fótbolti.net við hann, en rúmar þrjár vikur eru þar til flautað verður til leiks í Bestu deildinni.
Sölvi Geir Ottesen, þjálfari Víkings, var á meðal þeirra sem tóku til máls á fundinum og ræddi Fótbolti.net við hann, en rúmar þrjár vikur eru þar til flautað verður til leiks í Bestu deildinni.
„Það byggist alltaf meiri og meiri eftirvænting því nær sem dregur. Það er alltaf þannig og gerir það svo sannarlega hjá okkur. Við vorum að koma úr góðri æfingaferð sem gekk mjög vel. Við erum á flottum stað, nokkurn veginn á staðnum sem við viljum vera á fyrir mót. Þannig við erum mjög spenntir.“
Hvernig er staðan á hópnum?
„Hún er góð. Það eru allir frískir nema Daði Berg. Sem er í sínu bataferli. Hann á dálítið eftir í því. Annars eru allir komnir út á völl og byrjaðir að spila. Sveinn Margeir þar á meðal, hann er kominn aftur út á gras. Staðan er mjög góð á hópnum þegar kemur að meiðslum.“
Stór hópur og stór markmið
„Það er flott að opnunarleikurinn sé á móti Breiðabliki, byrjum þetta strax með látum. Þetta verður hörku tímabil. Við erum að fara verja titil. Það hefur reynst erfitt síðustu ár en með hópinn sem við erum með í dag er ég mjög bjartsýnn á að okkur takist það.
Við þurfum að vera með stóran hóp til að ná okkar markmiðum. Til að keppast um alla titlana á Íslandi og að ná langt í Evrópu þá þarf hópurinn að vera stór og sterkur. Við teljum okkur vera með þannig hóp í ár.“
Vonast til að sjá Jóa í grænu
Mikið hefur verið rætt og ritað um að Jóhann Berg sé á heimleið og muni ganga í raðir Breiðabliks. Sölvi segist vonast til þess að sjá hann í grænu í sumar.
„Það væri frábært að fá Jóa inn í íslensku deildina. Hann myndi gera hana ennþá skemmtilegri. Vonandi kemur hann heim og í Blikana, þá verður þetta enn skemmtilegra einvígi.“
Nánar er rætt við Sölva í spilaranum hér að ofan
