Jon Moss er einn litríkasti dómarinn í ensku úrvalsdeildinni en hann mun halda um flautuna í kvöld þegar Fulham og Wolves eigast við.

Það eru ekki margir sem vita það að Moss er gríðarlegur tónlistaráhugamaður og þegar hann ferðast um Bretlandseyjar til að dæma reynir hann alltaf að koma við í plötubúðum.

Hann er duglegur að fara á tónleika og þá er hann sjálfur gítarleikari í Indie-rokkhljómsveit sem heitir Power Sleep. Sú hljómsveit hefur reyndar ekki náð miklum hæðum og kemur ekki oft saman en spilar frumsamin lög. Moss sjálfur hefur gantast með það í viðtölum að hljómsveitin sé í raun og veru hræðileg.

Hann opnaði vínylplötubúð í Leeds árið 2019 og ber búðin viðeigandi nafn, 'The Vinyl Whistle' eða Vínyl-flautan. Hugmyndina að nafninu á kollegi Moss, úrvalsdeildardómarinn Graham Scott.