Bayer Leverkusen tók á móti FC Bayern í afar eftirvæntum titilslag þýska boltans og úr varð góður leikur, þar sem heimamenn í Leverkusen sýndu yfirburði.

Josip Stanisic skoraði gegn sínum gömlu liðsfélögum og leiddu heimamenn í Leverkusen 1-0 í leikhlé, eftir að hafa verið talsvert sterkari aðilinn og óheppnir að tvöfalda ekki forystuna.

Bakvörðurinn knái Alex Grimaldo tvöfaldaði forystuna í upphafi síðari hálfleiks eftir stoðsendingu frá Nathan Tella og tókst Bæjörum ekki að minnka muninn.

Heimamenn gerðu vel að loka á Bayern í síðari hálfleik, áður en Jeremie Frimpong skoraði þriðja markið á 95. mínútu til að innsigla sannfærandi 3-0 sigur.

Leverkusen er með fimm stiga forystu á toppinum og hefur ekkert lið verið líklegra til að binda enda á ótrúlega sigurgöngu Bayern í þýsku deildinni á undanförnum árum.

Bayern hefur unnið deildina síðustu ellefu ár en lærisveinar Xabi Alonso ætla ekki að leyfa þeim að hirða tólfta Þýskalandsmeistaratitilinn í röð.