England: Lok, lok og læs hjá Martinez

Við fengum því miður engan markaleik í lokaleik dagsins í enska boltanum sem var nú að ljúka.

Brighton fékk Aston Villa í heimsókn á Amex völlinn en fyrri leik liðanna á tímabilinu lauk með 2-1 sigri þess fyrrnefnda.

Í hinum þremur leikjum dagsins voru að minnsta kosti þrjú mörk skoruð og var vonast eftir því sama í þessum leik.

Því miður fyrir áhorfendur voru engin mörk skoruð en heimamenn í Brighton voru þó mun sterkari aðilinn allan leikinn.

Brighton átti margar marktilraunir að marki Villa en Emiliano Martinez í marki gestaliðsins var frábær og kom í veg fyrir mörk.

Martinez kom frá Arsenal í sumarglugganum og varði alls níu skot í kvöld.