Breiðablik og FH áttust við í fyrstu umferð Lengjubikars karla í dag og tóku heimamenn forystuna á Kópavogsvelli þegar Eyþór Aron Wöhler skoraði um miðjan fyrri hálfleik.

Miðjumaðurinn þaulreyndi Björn Daníel Sverrisson jafnaði fyrir FH í seinni hálfleik með skoti fyrir utan teig sem Anton Ari Einarsson, markvörður Blika, átti líklegast að verja.

Dusan Brkovic, sem kom til FH frá KA í vetur, tók svo forystuna fyrir Hafnfirðinga þegar boltinn datt til hans eftir atgang í vítateignum á 77. mínútu.

Það var hinn efnilegi Baldur Kári Helgason sem innsiglaði sigur FH undir lokin með frábæru skoti eftir vandræðagang hjá Viktori Erni Margeirssyni í vörn Blika.

Lokatölur 1-3 og frábær sigur FH staðreynd.