Vanheusden kostaði metfé á sínum tíma - 12,5 milljónir evra. Það var hæsta verð sem belgískt félag hafði nokkurn tímann greitt fyrir fótboltamann.
Belgíski varnarmaðurinn Zinho Vanheusden er genginn aftur til liðs við Inter í annað sinn á ferlinum.
Vanheusden þótti efnilegasti varnarmaður Belgíu á sínum tíma og var fenginn til Inter frá Standard Liege.
Hann var lykilmaður í unglingaliði Inter en sleit krossband og var lánaður aftur heim. Meðan hann var heima í láni vantaði Inter pening til að standast fjármálaháttvísisreglur FIFA og skikkuðu Ítalirnir kollega sína í Belgíu til að greiða metfé fyrir Vanheusden.
Nú er kominn tími til að borga til baka og festi Inter kaup á belgíska miðverðinum á nýjan leik. Hann er að verða 22 ára síðar í júlí og á einn A-landsleik að baki fyrir Belgíu. Allar líkur eru á að hann verði lánaður til annars félags í Serie A í haust.
Vanheusden bar fyrirliðabandið hjá Standard Liege og er í miklu uppáhaldi hjá stuðningsmönnum sem telja hann geta fest sig í sessi í landsliðsvörn Belga. Hnéð hans er helsta vandamálið en hann meiddist illa í fyrra, í annað sinn á sínum stutta ferli.
Athugasemdir