FH-ingar eru komnir með farseðilinn í 16-liða úrslit Mjólkurbikarsins eftir að hafa komið til baka og unnið 4-2 sigur á Þór í Boganum í dag.

Þórsarar þurftu aðeins nítján mínútur til að brjóta ísinn er Ragnar Óli Ragnarsson stangaði hornspyrnu Atla Sigurjónssonar í netið.

Fyrsta mark Ragnars á tímabilinu sem skoraði einmitt eitt mark á síðustu leiktíð.

FH-ingar svöruðu ellefu mínútum síðar. Arnór Borg Guðjohnsen slapp í gegn eftir langa sendingu inn fyrir, Aron Birkir Stefánsson markvörður Þórsara var í boltanum en ekki nóg til þess að stöðva skot Arnórs og staðan jöfn.

Þeir hömruðu járnið meðan það var heitt. Adolf Daði Birgisson kom FH-ingum yfir fjórum mínútum síðar eftir misskilning í vörn Þórsara. Gils Gíslason komst inn fyrir, lagði boltann til hliðar á Adolf sem skoraði.

Ágúst Eðvald Hlynsson komst nálægt því að jafna metin áður en flautað var til loka fyrri hálfleiks en skot hans fór í stöngina.

FH-ingar komust í tveggja marka forystu með smá heppni á 67. mínútu er Kjartan Kári Halldórsson átti hálfgerða fyrirgjöf sem Aron Birkir missti einhvern veginn inn í markið og þá gerði Adolf Daði annað mark sitt er hann fékk bolta frá Grétari Snæ Gunnarssyni, lagði hann fyrir sig og setti boltann í netið.

Í uppbótartíma skoraði Aron Ingi Magnússon sárabótarmark fyrir Þórsara með frákasti eftir að Jökull hafði varið skalla Ragnars Óla út í teiginn.

Adolf Daði var hársbreidd frá því að fullkomna þrennuna undir lok leiks en boltinn í þverslá. Þetta var það síðasta markverða sem gerðist í þessum leik og eru það FH-ingar sem eru komnir áfram í 16-liða úrslit.