„Það er sárt að tapa, það eru viðbrögðin," sagði Alex Freyr Hilmarsson, fyrirliði ÍBV, eftir að liðið féll úr leik í Mjólkurbikarnum eftir tap gegn Þrótti eftir vítaspyrnukeppni.
Lestu um leikinn: ÍBV 4 - 6 Þróttur R.
Veðrið í Eyjum hefur strítt liðinu en liðið hefur ekki getað spilað eins marga leiki og það hefði viljað. Liðinu tókst sem dæmi ekki að klára Lengjubikarinn.
„Það er slæmt að geta ekki spilað þessa leiki og slípa sig saman. Þetta er samt leikur sem við eigum að klára, mér finnst við vera með yfirhöndina í leiknum og það eru draugar síðustu leikja sem koma í fyrsta markinu. Þvílíkt klúður, algjör gjöf," sagði Alex Freyr.
„Við erum að fá aragrúa af góðum stöðum og færum sem við eigum að klára. Þetta er á okkur að hafa ekki klárað þennan leik."
