Víkingur
Eins og fjallað hefur verið um þá mætir Víkingur liði Levadia Tallinn frá Eistlandi í undanúrslitum umspilsins fyrir forkeppni Meistaradeildarinnar 21. júní. Sigurliðið leikur svo til úrslita þremur dögum síðar við lið frá San Marínó eða Andorra um sæti í forkeppninni. Umspilið fer fram á Víkingsvelli.

Ef Víkingur vinnur umspilið fer liðið í tveggja leikja einvígi við Svíþjóðarmeistara Malmö í 1. umferð forkeppni Meistaradeildarinnar.

Mögulegir mótherjar Víkings:
Ef Íslands- og bikarmeistararnir koma á óvart og vinna Malmö mun liðið mæta Ballkani frá Kosóvó eða Zalgiris frá Litháen í næstu umferð forkeppni Meistaradeildarinnar.

Ef Víkingur kemst í viðureignina gegn Malmö en tapar þá fer liðið inn í 2. umferð forkeppni Sambandsdeildarinnar og leikur gegn The New Saints frá Wales eða Linfield frá Norður-Írlandi.

Ef Víkingur tapar gegn Levadia Tallinn í umspilinu mun liðið fara inn í 2. umferð forkeppni Sambandsdeildarinnar og leikur gegn Shamrock Rovers frá Írlandi eða Hibernians frá Möltu.

Og ef Víkingur tapar úrslitaleik umspilsins þá fer liðið einnig inn í 2. umferð forkeppni Sambandsdeildarinnar en mætir Pyunik frá Armeníu eða Cluj frá Rúmeníu.

Breiðablik:
Í gær varð ljóst að Blikar munu leika gegn Santa Coloma frá Andorra í 1. umferð forkeppni Sambandsdeildarinnar. Kópavogsliðið er talsvert sigurstranglegra í því einvígi og með sigri myndi það þá mæta Buducnost Podgorica frá Svartfjallalandi eða Llapi frá Kosóvó í 2. umferðinni.

KR:
KR-ingar eiga erfitt verkefni fyrir höndum gegn pólska liðinu Pogon Szczecin í 1. umferð forkeppni Sambandsdeildarinnar. Sigurliðið í einvíginu mun mæta danska liðinu Bröndby í 2. umferðinni.