Hákon Arnar: Vonandi byrjar hann ekki

Liðin spila úrslitaleik um sæti í umspilinu fyrir HM 2026 í Varsjá á morgun.

Á fréttamannafundi fyrir leikinn var Hákon Arnar Haraldsson, fyrirliði landsliðsins, spurður af úkraínskum fjölmiðli út í fyrri leikinn og hvaða leikmaður hefði verið erfiðast að eiga við. Hann svaraði með því að nefna Malinovskyi sem skoraði tvennu í 3-5 sigri Úkraínu á Laugardalsvelli.

Undirritaður spurði þá Arnar Gunnlaugsson og Hákon hvort þeir byggjust við miklum breytingum á liði Úkraínu, hvort þeir byggjust við því að sjá Malinovskiy og Vitaliy Mykolenko, vinstri bakvörð Everton sem spilaði ekki heldur gegn Frökkum, spila leikinn á morgun.

Finnst eins og Úkraína eigi eftir að sýna sitt rétta andlit
„Það er erfitt að lesa í síðasta leik hjá þeim, þeir fóru til Frakklands og reyndu að ná jafnteflinu. Þeir mögulega áttu að fá víti og hefðu getað með því komist í 0-1. Liggur við nokkrum sekúndum seinna voru þeir komnir með víti á sig, 1-0 undir og þá fannst mér eins og þeir fóru í sitt kerfi, en réðu engan veginn við það á móti Frökkum. Það sýnir kannski hversu sterkir við vorum á móti Frökkum."

„Þetta er búinn að vera skrítinn riðill. Eins og staðan er í dag finnst mér eins og við eigum meira skilið að komast áfram miðað við frammistöðurnar á móti Aserbaísjan og Frökkum samanborið við það sem Úkraína sýndi. En það er ekkert horft í þessa frammistöðu, það telur bara hvernig leikirnir enda og hvernig stigataflan verður í lokin."

„Mér finnst eins og Úkraína eigi samt eftir að sýna sitt rétta andlit, og vonandi verður það ekki á morgun. Það er eins og þeir hafi strögglað aðeins í þessum riðli," sagði landsliðsþjálfarinn Arnar.

„Þurfum við ekki bara að sjá til á morgun hvort hann (Malinovskyi) byrji eða ekki? Vonandi ekki, en ég býst við því (að hann byrji)," sagði Hákon.