Íslenski landsliðsmaðurinn Jón Dagur Þorsteinsson er á óskalista nokkurra félaga í ensku úrvalsdeildinni en Mirror greinir frá þessu.
Mirror nefnir Newcastle, West Ham og Leicester til sögunnar en Leicester er talið vera í bílstjórasætinu af liðum í úrvalsdeildinni.
Jón Dagur, sem skoraði mark Íslands í sigri gegn Englandi á Wembley á dögunum, er leikmaður Leuven í Belgíu en sömu eigendur eiga Leuven og Leicester. Samningur hans við belgíska liðið rennur út næsta sumar.
Eftir landsleikinn gegn Englandi hefur áhuginn á Jóni Degi margfaldast, sérstaklega hjá félögum í úrvalsdeildinni. Jón Dagur þekkir til á Englandi en hann var í unglingaliði Fulham tímabilið 2018-2019.
Jón Dagur skoraði sjö mörk og lagði upp sjö til viðbótar fyrir Leuven á síðustu leiktíð.
