Pedri er aðeins 17 ára gamall og er búinn að skora tvö mörk á tímabilinu, í stórsigrum gegn Ferencvaros og Real Betis. Hann kemur úr mikilli Barca-fjölskyldu og hefur Barcelona verið hans uppáhaldsfélag frá æsku.

Honum var þó eitt sinn boðið að prófa að æfa með akademíu Real Madrid en hann þótti ekki nægilega góður. Í dag segist Pedri vera þakklátur fyrir höfnunina í Madríd.

„Ég fór í prufu hjá Madrid og þeir sögðu mér að ég væri ekki nógu góður. Ég vil þakka manneskjunni sem tók þá ákvörðun innilega því núna er ég kominn til liðsins sem ég hef alltaf viljað spila fyrir," sagði Pedri.

Barca borgaði 5 milljónir evra fyrir Pedri í sumar, auk árangurstengdra aukagreiðslna, en hann var skærasta stjarna Las Palmas á síðustu leiktíð.

Pedri er sóknarsinnaður miðjumaður að upplagi en getur einnig leikið á báðum köntum. Hann á ellefu leiki að baki fyrir yngri landslið Spánar.

Barcelona er aðeins með 11 stig eftir 7 umferðir á nýju tímabili á Spáni. Real Madrid er með 16 stig eftir 8 umferðir.