Richarlison, leikmaður Everton á Englandi, tók sér stutt hlé frá því að fagna öruggu sæti liðsins í deildinni og ákvað að senda sérstök skilaboð á enska sparkspekinginn Jamie Carragher á Twitter í gær.
Brasilíumaðurinn er ekki allra en hann hefur svo sannarlega átt sinn þátt í að halda Everton í deild þeirra bestu.
Hann skoraði annað mark liðsins í 3-2 sigrinum á Crystal Palace í gær og hefur stigið upp í mikilvægu leikjunum.
Leikstíll hans hefur þó farið í taugarnar á andstæðingum Everton og leikþættirnir sem hann hefur boðið upp á. Carragher hefur oft rætt um hann á Sky og hvernig hann gerir sér uppi meiðsli og beitir fantabrögðum.
„Þetta hefur ekkert með hlutdrægni að gera þegar ég tala um Richarlison. Hann dettur í grasið 3-4 sinnum í leik eins og hann sé stórmeiddur og svo rífur hann sig á lappir. Þetta snýst ekki um að fá aukaspyrnu eða vítaspyrnu heldur er hann bara að gera sér upp meiðsli þegar hann er augljóslega ekki meiddur," sagði Carragher á Twitter fyrir nokkru síðan.
Richarlison, sem hefur verið að fagna fram á kvöld í gær, ákvað að kíkja aðeins á Twitter og láta Carragher heyra það.
„Þvoðu þér um munninn áður en þú talar um mig og Everton. Ég ber enga virðingu fyrir þér," sagði Brasilíumaðurinn.
@Carra23 wash your mouth before you talk about me and everton and I don't respect you 💩
— Richarlison Andrade (@richarlison97) May 20, 2022
Athugasemdir
